Gibuntog sa Amerikanong si Teofimo Lopez ang kanhi way pidleng Briton nga si Josh Taylor pinaagi sa unanimous decision aron sakmiton ang WBO light welterweight title kagahapong adlawa.
Ang tulo ka mga judges mipabor sa 25-anyos nga si Lopez sa iskor nga 115-113, 115-113 ug 117-111.
"I'm so thankful. It has been a long time coming," matud pa ni Lopez. "We just beat the number one guy, former undisputed world champion. It was about doing what I needed to do."
Si Lopez miinat sa iyang record ngadto sa 19-1 samtang ang 32-anyos nga si Taylor nakatilaw sa una niining pilde sud sa 20 ka away.
Sa iyang pagbihag ni Taylor, si Lopez, nga kanhi world lightweight champion, nahimong usa ka two-division world champion.
Si Lopez natumba sa ikaduhang hugna samtang si Taylor nahagba sa ikatulong hugna apan parehong gideklara ni reperi Michael Griffin nga nadakin-as lamang sila.