CEBU, Philippines — Managlahi ang tumong sa Miami Heat ug Boston Celtics sa Game 5 sa ilang best-of-seven NBA Eastern Conference finals karong buntag didto sa TD Garden sa Boston, Massachusetts.
Ang Heat mosuway og usab pag-angkon og luna sa NBA Finals samtang ang Celtics nanghinaut nga malugwayan pa ang ilang season og laing usa ka duwa.
Giharos og daog sa Heat ang nag-unang tulo ka duwa sa serye apan ang Celtics nakakubit pa og laing kinabuhi human mipatigbabaw sa Game 4, 116-99, didto sa Miami niadtong Miyerkules.
Wala pay team nga nakabangon human malubong og 3-0 sa usa ka serye apan ang Celtics nakakita og tsansa nga mohimo og kasayayan human sila makabawos sa Heat, 116-99, luyo sa pagpanginit ni Jayson Tatum nga mibubo og 33 puntos ug 11 ka rebounds.
Bukid pa hinoon ang tungason sa Celtics apan dako kaayo ang puruhan nga ilang mausban og parot ang Heat didto sa ilang tugkaran.
Ang makapuwersa og Game 6 maoy ilang tiradahan atubangan sa ilang mga fans.
"As cliche as it sounds, we just tried to take it one game at a time. We tried to break it down. We didn't play well the first three games, we didn't deserve to win, but we didn't want that to define us, define the season," matud pa ni Tatum. "We've still got a long uphill battle to go. But this was a good start. Just to try to carry this momentum."
Gawas ni Tatum, kinahanglan sab nga mosalida sab sila si Jaylen Brown, Marcus Smart, Derrick White ug Malcolm Brogdon aron ilang mapiog na sab ang Heat.
Andam hinoon ang Heat nga atubangon ang dakong hagit nga nag-atang kanila sa teritoryo sa ilang kontra.
"Our guys really want this," dason pa ni Miami coach Erik Spoelstra.
Sa gihapon, sandigan sa Heat sila si Jimmy Butler, Bam Adebayo, Gabe Vincent, Caleb Martin, Max Strus ug Kyle Lowry pagkab-ot sa ilang tinguha nga mamahimong labing unang eigth-seeded team nga nakatikang sa NBA Finals sukad sa New York Knicks niadtong 1999.