CEBU, Philippines — Si All-Star guard Kyrie Irving moabli og bag-ong panid sa iyang karera sa NBA.
Kini human ang Brooklyn Nets nakakab-ot og kasabotan aron i-trade si Irving ngadto sa Dallas Mavericks.
Nahitabo kini duha lamang ka adlaw human si Irving mipahibawo nga gusto niyang mopahawa gikan sa poder sa Nets.
Sigun sa taho sa The Athletic, makuha sa Nets hulip ni Irving mao sila si Spencer Dinwiddie, Dorian Finney-Smith ug pipila ka draft picks.
Interesado sab unta ni Irving ang Phoenix Suns, Los Angeles Lakers, ug Los Angeles Clippers apan ang Mavs maoy labing nangusog ug mihimo dayon og lakang aron kuhaon ang Australyanong point guard.
Si Irving, nga unang misikat uban sa Cleveland Cavaliers diin siya nakadaog og kampiyonato kauban si LeBron James niadtong 2016, mi-average og 27 puntos, lima ka rebounds, ug pito ka assists ning season.
Sa pagtapon niya sa Dallas, makauban ni Irving ang laing eksplosibong guwardiya nga si Luka Doncic, nga dunay average nga 33.4 puntos matag duwa.
Koronasyon ni Lebron
Dili na kapugngan ang koronasyon ni LA Lakers superstar LeBron James isip NBA all-time scoring leader sud ning semanaha.
Si James nanginahanglan na lang karon og 36 puntos aron buk-on ang karaan na kaayong record ni Kareem Abdul-Jabbar nga nakahipos og 38,387 puntos sa mabulokon niining karera.
Makab-ot ni James ang maong dungog sa ilang duwa batok sa Oklahoma City Thunder karong Miyerkules o dili ba batok sa Milwaukee Bucks karong Biyernes.
Curry di pa kaduwa
Ang alas sa Golden State Warriors nga si Stephen Curry dili makaduwa sud sa pipila ka semana gumikan sa injury nga iyang nahiaguman sa wala niyang paa.
Nayayay si Curry human sila magbangga ni McKinley Wright sa Dallas Mavericks sa ikatulong kuwarter atol sa ilang enkuwentro niadtong Dominggo.
Dili pa madertermina sa pagka karon kon kanus-a siya makabalik sa korte.