CEBU, Philippines — Ang kagamhanan sa dakbayan sa Sugbo nga gipangulohan ni mayor Michael Rama buot nga mo-host sa Palarong Pambansa sa tuig 2024.
Pormal kining gipahibawo ni Rama ug Cebu City Sports Commission chairman John Pages atol sa usa ka press conference kagahapon kauban sila si konsehal Donaldo Hontiveros ug Philippine Sports Commissioner Edward Hayco.
Matud pa ni Pages nga ilang nang gisumite ang ilang suwat pagpadayag sa interes sa siyudad nga mopahigayon sa labing dako nga torneyo alang sa mga estudyanteng atleta lukop nasud.
Si Rama gibati og tumang kahinam nga ang dakbayan maka-host og balik sa Palaro dungan ang pasalig sa usa ka hapsay nga dagan sa kompetisyon ug world-class nga pasilidad sa tanang mga partisipante.
Ang labing una ug bugtong higayon nga ang Sugbo nag-host sa Palaro nahitabo niadto pang 1994.
Mao nang hugtanong gipaluyohan ni Rama ang lakang nga mabalik ang Palaro sa dakbayan.
Subay niini, si Rama nagkanayon nga iya nang gi-estoryahan si Hans Sy sa SM aron pagpasan ang pagtrabaho sa gipatukod nilang sports arena sa SRP.
Samtang ang sports center ipaubos sa usa ka dakong rehabilitasyon.
Aron ang PSC makatampo og pundo sa dakbayan sa pagpanindot niini sa sports center, si Hayco mibutyag nga plano nilang himoon ang CCSC nga usa ka regional training center.
Sa iyang bahin, si Hontiveros misaad nga ilang buhaton ang tanan kutob sa ilang mahimo aron makabuhat og butang nga ikapasigarbo sa mga Sugbuanon.
“We’re just excited for next year and we have a full year to do all the work and hopefully nindot gyud ni siya nga preparation with Mayor Mike and chairman John. Sa iyang (Rama) pag-empower namo, we will make it happen and we will make our fellow Cebuanos proud,” dason pa ni Hontiveros.