CEBU, Philippines — Si LeBron James mipupo og triple-double uban ang 28 puntos, 10 ka rebounds ug 11 ka assists sa dihang gipiog sa Los Angeles Lakers ang New York Knicks sud sa overtime, 129-123, sa NBA kagahapon didto sa Madison Square Garden sa New York.
Gumikan niini, ang 38-anyos nga si James nanginahanglan na lang og 89 puntos aron papason ang karaang record ni Kareem Abdul-Jabbar isip all-time scoring leader sa NBA.
Posibleng makab-ot na ni James ang makasaysayong dungog sa ilang duwa batok sa Oklahoma City Thunder unya sa Pebrero 8.
Sa impresibo niyang salida batok sa Knicks, si James mikulit og laing record gumikan kay iya mang gilabyan sila sila si Mark Jackson ug Steve Nash aron pag-angkon sa ikaupat nga puwesto sa NBA all-time assists leaders.
Si James nakakuha og igong suporta gikan ni Anthony Davis nga mihipos og 27 puntos ingon man sa bag-o nilang katropa nga si Rui Hachimura nga mikimada og 19 puntos ug siyam ka rebounds. Nagparamdam sab si Russell Westbrook uban ang 17 puntos.
Sa laing duwa, si Giannis Antetokounmpo miharos og 34 puntos ug 18 ka rebounds sa dihang gibugha sa Milwaukee Bucks ang Charlotte Hornets, 125-115.
Sila si Khris Middleton ug Jrue Holiday nakumboya'g 33 puntos alang sa Bucks, nga nagpabilin sa ikaduhang dapit sa Eastern Conference bitbit ang 34-17 record.
Didto sa Cleveland, si Jimmy Butler mitali og 23 puntos aron tabangan ang Miami Heat pagbuntog sa Cavaliers, 100-97.
Dako sab og natampo sila si Caleb Martin, Bam Adebayo ug Tyler Herro nga mitimbre og 18 puntos matag usa alang sa Heat.
Didto sa Chicago, si Kawhi Leonard mirapido og 33 puntos samtang si Norman Powell miposte og 27 puntos sa dihang gitumba sa Los Angeles Clippers ang Bulls, 108-103.