CEBU, Philippines — Mirehistro og double-double si Geory Apas aron giyahan ang Goutsource Solutions International (GSI) makaipsot batok sa Jot Trucking, 60-56 sa 1st Zynergia Cup niadtong Domingo diha sa CEC gym, Cebu City.
Si Apas miiskor og 13 puntos, milangkat og 11 ka rebounds uban ang tulo ka assists nga igo na kaayo alang kaniya aron ilhon isip best player of the game.
Sila si Francis Mateo ug Darwin Rollon mitampo’g 11 ug 10 puntos matag usa alang sa team ni Ivan Llesol nga nagbitbit na karon og 3-2 nga baraha.
Si Arjay Mendoza miposa og 11 puntos ug mao lang ang bugtong player nga miiskor og double figures sa Jot Trucking ni Jeffrey Tagacanao nga adunay 2-3 record.
Sa laing bahin, si Onin Secret mihimo sab og double figures uban ang 19 puntos, 10 ka rebounds aron pangulohan ang Donling Aircon and Refrigeration Services nga mibuntog sa JJS Electrical Supply, 88-78.
Gawas niini, si Onin mihatag sab og unom ka assists aron ilhong best player of the game.
Ang Donling ni Romeo Quilaton nakakuha sab og igong suporta gikan ni Roldan Daug pinaagi sa iyang 11 puntos, ingon man nilang Voltaire Lumoya ug Arsenio Sugcay sa ilang 10 puntos.
Wala kapahimusli ang 26 puntos ni Soc Ramas kay ang JJS nakatilaw sa ilang ikatulong pilde batok sa duha ka daog ning maong liga nga giorganisar sa Brothers Ballclub.
Si Jessie Sanchez mipabuto’g 22 puntos, samtang si Randy Awit mihipos og 11 puntos sa JJS Electrical ni Joeffrey Banaag.
Puntos matag usa
Unang duwa:
GSI (60) - Apas 13, Mateo 11, D. Rollon 10, Mercado 8, Rollon 8, Maata 6, Geronca 6, Rollon 2.
Jot Trucking (56) - Mendoza 11, Vestra 9, Opena 8, D. Barcoso 7, Inocensio 7, Barcoso Jr. 5, Antona 4, Romo 2, Rivera 2.
Ikaduhang duwa:
Donling (88) - Secret 19, Daug 11, V. Lumoya 10, Sugcay 10, Ponce 7, Dionson 7, Tampus 4, Ravina 4, Balderas 4, Quilaton 3.
JJS (78) - Ramas 26, J. Sanchez 22, Awit 11, E. Sanchez 9, Vargas 7, Morfe 4, Busmion 4, J. Banaag 3, Pagambunan 2, Banaag 2, Casinillo 2. — Yoyo R. Abayan