CEBU, Philippines — Usa ra sa duha ka free throws ang napasud ni Ryan Geonzon, apan igo na kaayo kini aron agakon niya ang Violex Trading ngadto sa sikit nga kadaogan batok sa TMV Solid Ground Construction Engineering Building Finishing, 59-58 sa 1st Zynergia Cup 2023 niadtong Domingo sa CEC gym.
Mosangpot unta sa overtime ang duwa human magtabla ang iskor-58-all sa daginutong segundos, apan nabaraw kay si Geonzon nga kursonadang milusot nakakubit og foul gikan ni Jessie Binolirao dungan sa pagtingog sa final buzzer.
Si Dan Cardenas nga mibagnos og 19 puntos, lima ka rebounds ug lima sab ka assists alang sa Violex Trading ni team manager CJ Cardenas maoy topscorer ug best player of the game.
Mipupo sab og 19 puntos si Charlee Lumasag aron pangulohan ang TMV ni Theresa Villarino, samtang si Francis Bauntad miamot og 16 puntos.
Sa laing duwa, ang Donling Aircon and Refrigeration Services midaog batok sa Jot Trucking, 66-62 sa pagpangulo sa best player niining si Roldan Daug, kinsa miposa’g 12 puntos, walo ka rebounds ug tulo ka assists. Si Angelo Ponce mitampo sab og 12 sa Donling sa team ni Romeo Quilaton.
Ang Jot Trucking ni Jeffrey Tagacanao gipangulohan ni JJ Vestra nga miantog og 14 puntos, gisundan ni Arjay Mendoza sa iyang 13 puntos ug Dondon Barcoso nga dunay 12 puntos.
Ang Violex ug Donling parehong nagbitbit og 1-0 nga baraha sa maong liga nga giorganisar sa Brothers Ballclub.