CEBU, Philippines — Si Stephen Curry mikolekta og 25 puntos, 11 ka rebounds ug walo ka assists aron pangulohan ang Golden State Warriors ngadto sa 137-114 nga demolisyon sa Minnesota Timberwolves sa NBA kagahapon didto sa Target Center sa MinneapolIs, Minnesota.
Mikuha sab og atensiyon si Draymond Green nga miposte sa labing una niyang double-double ning season uban ang 19 puntos ug 11 ka assists alang sa Warriors nga miinat sa ilang record ngadto sa 11-10 human makasagunson og tulo ka daog.
Dako sab og natampo sila si Klay Thompson ug Jordan Poole nga nagkumboya og 45 puntos alang sa Warriors, nga wala na molingi pa sukad gipabuthan ang Wolves og makabungog nga 17-0 run pagsugod sa duwa.
Sila si Anthony Edwards ug Karl-Anthony Towns nagkumbinar og 46 puntos sa pilderong Wolves.
Sa laing aksiyon, si Giannis Antetokounmpo mipatuasik og 30 puntos ug 11 ka rebounds samtang si Grayson Allen miposa og pito ka tres sa iyang 25 puntos sa dihang gitumba sa Milwaukee Bucks ang Dallas Mavericks, 124-115.
Si Luka Doncic mi-iskor og 27 puntos apan way nahimo gumikan kay ang Mavs nasugamak sa ikaupat nilang sunod-sunod nga pilde.
Didto sa Boston, ang Celtics yanong mipayaka sa Washington Wizards, 130-121, bisan og wala ang kandidato pagka-MVP nga si Jayson Tatum kay dunay angol.
Si Jaylen Brown maoy nangu sa Celtics uban ang 36 puntos.
Sa Madison Square Garden, si Ja Morant mikadlit og triple-double uban ang 27 puntos, 10 ka rebounds ug 14 ka assists sa dihang ang Memphis Grizzlies nakaipsot batok sa New York Knicks, 127-123.
Samtang si Kevin Durant mitimbre og 31 puntos ug si Seth Curry midugang og 29 puntos sa dihang gipaksit sa Brooklyn Nets ang Portland Trail Blazers, 111-97.
Didto sa Los Angeles, si Ivica Zubac mipupo og 31 puntos ug 29 ka rebounds aron pangulohan ang Clippers ngadto sa 114-100 nga pagpakaging sa Indiana Pacers.