CEBU, Philippines — Gibaslan sa Pitogo ang Cabangahan, 85-80, aron pagpuwersa og knockout match sa ilang best-of-three SK category A semifinals sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si James Maglasang mikadlit og 29 puntos alang sa Pitogo samtang sila si John Lloyd Pepito ug Froilan Maglasang mitali og 21 ug 17 puntos.
Sila si Brevin Keith Padayogdog, Adrian Panangin, ug Marvin Devila nagkumboya'g 54 puntos apan ang ilang paningkamot nakawang ning higayona alang sa Cabangahan.
Sa laing best-of-three SK semis, sila si Rovello Robles ug Paulo Dalumpines nagkumbinar og 44 puntos sa dihang giunhan sa Pulpogan ang Casili, 88-79. Si Prince Soquino nagparamdam sab sa Pulpogan uban ang 10 puntos. Sa midget category A, ang Casili nakaipsot batok sa Pulpogan, 101-99, aron pagmartsa ngadto sa kampiyonato. Si Clyde Alilin maoy bida sa Casili uban ang 30 puntos samtang sila si Lebron Gonzaga ug Laurence Justine Pamas miamot og 29 puntos.