CEBU, Philippines — Gikastigo sa Tolotolo ang Polog, 114-88, aron pag-abante ngadto sa midget category A final sa 11th Mayor Teresa "Nene" P. Alegado Fiesta Cup basketball tournament didto sa Consolacion, Cebu.
Si John Kenneth Bihag mipupo og 21 puntos samtang sila Brent Bihag ug John Luigie Balaba nagkumbinar og 23 puntos alang sa Tolotolo, nga mag-atubang sunod og malisud nga hagit batok sa Garing nga dunay twice-to-beat advantage sa ilang kampiyonato.
Sa SK category B, gitagak sa Tolotolo ang Lanipga, 114-88, aron paglukat og semifinal ticket.
Si Stephon Gonzales maoy nangu sa Tolotolo uban ang 25 puntos. Nakakuha hinoon siya og dakong suporta gikan nilang Rhanzel Quijano ug Jessie Bathan nga miwadwad og 20 puntos matag usa.
Sa laing bahin, gipalagpot sa Tilhaong ang Sacsac, 85-77, aron pagtikang sa senior category B semis diin ilang harongon ang Garing.
Si Daryl Dano miratsada og 23 puntos sa Tilhaong samtang sila si Junard Apao ug Kenny Tibon midonar og 14 puntos matag usa.