CEBU, Philippines — Ang siyam ka Pinoy road riders nga gipangulohan sa Sugbuanong si Zandro Fajardo sa OZ Racing nagpanikad nang mo-asdang sa giatngan nilang adventure ride nga giulohan og "Riding High Khardung La" nga gikatakda karong Agosto 20 ngadto sa Septiembre 1 didto sa Leh district sa Ladakh, India.
Duha ka adlaw sa dili pa sila molupad padung sa ilang destinasyon, gipaneguro ni Fajardo nga hitsas sila sa tanang mga ekipo nga ilang gikinahanglan sa makutas ug makuyaw nilang 12 ka adlaw nga ekspedisyon agi sa labing taas nga dalan sa tibuok kalibutan nga kagiagan lamang og motor.
"The safety and welfare of the participants is of paramount importance that is why we equipped ourselves with all the necessary gears for our maximum protection as we try to conquer one of the highest motorable pass in the world," matud pa ni Fajardo.
Ikauban ni Fajardo ning makasaysayanong biyahe sila si Camilo Bacalso Dacua, Christian Silva Netto, John Jedrick Syren, Wesley Syren, Joel Yuga, Jojo Yu, Kenneth Jude Timtim Villagonzalo, ug Aristotle Dionisio. Sentro sa ilang misyon mao ang pagtabok sa labing lisud ug makapaisa'g balahibo nga dalan sa India nga naglangkob og 1,300 ka kilometro sa makalisang nga gitas-on nga 18,380 feet above sea level.
Gipahigayon agi'g pagtambayayong sa Colokal (Explore beyond the usual), ang labing unang international touring event sa OZ Racing gipaluyohan sab sa Benelli, Motul, Kojie San, Motovita, Zanovoy, Archway Motorcycles, RideSFO, Trans One Port Solution, JABBRE, ROC, Tito Rex's Steak House, ug OZ Ex Moto Classic.
"It's a daunting task ahead but we're ready to rise above the challenge. We are doing this not only for personal pride, but also to make our fellow countrymen proud. We offer and dedicate this ultimate ride to the entire Filipino nation," panapos pa ni Fajardo.