CEBU, Philippines — Si Lucky Ecarma mitagak og 26 puntos sa dihang gipayaka sa Asian Orthopedics 2014 ang Batch 2019, 67-58, aron pagpabiling way pilde sa Sacred Heart Ateneo Alumni Basketball Athletic Association (SHAABAA) Season 25 didto sa Magis Eagles Arena sa Sacred Heart School-Ateneo de Cebu (SHS-AdC) sa Barangay Canduman, dakbayan sa Mandaue.
Si Ecarma, nga duna say siyam ka rebounds, tulo ka assists ug tulo ka steals, gipaluyohan ni Giovannie Laguyo nga mihipos og 18 puntos, unom ka rebounds ug pito ka assists alang sa Asian Orthopedics, nga mipahugot sa ilang pagkupot sa solong liderato sa Division C bitbit ang perpektong 3-0 record.
Sa laing duwa sa Division C, si Adven Jess Diputado mirapido og 29 puntos uban ang lima ka rebounds ug upat ka assists sa dihang ang Carampatana Food Corp. 2012 nakaipsot batok sa SABR Solutions, Inc. 2018, 92-88.
Si Maverick Suarez mi-iskor og 12 samtang si Julius Cadavis mitampo og 10 puntos ug 10 ka rebounds alang sa ikaduhang sagunson nga daog sa Batch 2012. Sa Division A, si Romeo Alejandro mipabuhagay og 34 puntos, 12 ka rebounds, walo ka assists ug tulo ka steals sa dihang giablihan sa Speed Demon 1996 ang ilang kampanya pinaagi sa 86-64 nga demolisyon sa Batch 2002.
Nagparamdam sab si Paulsen Uy sa Batch 1996 uban ang 14 puntos, walo ka rebounds ug siyam ka assists ingon man si Giovanni Borromeo nga mipupo og 14 puntos, pito ka rebounds ug upat ka assists. Sa Division B, si Leigh Christian Dixon mipatuasik og 21 puntos, 32 ka rebounds, duha ka assists, duha ka steals ug upat ka blocks aron aswaton ang Bad Boys Wingz 2007 ngadto sa kulbahinam nga daog batok sa Starkwood Properties 2009, 56-54.