CEBU, Philippines — Ang Simple Blends nagsandig sa eksplosibong salida ni Ralph John Belarmino sa dihang gitunolan nila ang ang Team Kobe sa labing una niining pilde, 52-44, sa Hoop Nation Arlon Cup Season 1 didto sa City Sports Club-Cebu gym. Si Belarmino mirehistro og impresibong double-double uban ang 21 puntos ug 15 ka rebounds alang sa Simple Blends nga milayat ngadto sa ikaduhang dapit sa liderato sa East Division bitbit ang 7-2 win-loss record.
Si Jonas Mejos nalimitahan ngadto lamang sa 10 puntos alang sa Team Kobe, kansang walo ka sagunson nga daog natuldokan. Sa laing sangka sa East, si Randy Ty mipupo og 16 puntos, lima ka rebounds ug tulo ka assists sa dihang ang Brothers nakaipsot batok sa Tera, 66-63, alang sa ikatulo nilang daog sa walo ka duwa. Si Aldrin Fernandez mitali og 17 puntos apan nahoyhoy ang abaga gumikan kay ang Tera natagak ngadto sa 2-6. Didto sa West, ang RKC munasginhawang mipiog sa Manumen, 64-62. Si Mark Michael Pahid mihipos og 24 puntos, 13 ka rebounds ug tulo ka assists alang sa RKC nga miposte sa ikaduha pa lamang nila nga daog sud sa pito ka aksiyon. Si Raul Pangilinan miposa og upat ka tres sa iyang 24 puntos uban ang walo ka rebounds apan way nahimo gumikan kay ang Manumen nahagsa ngadto sa 2-6.