4 ka Pinoy mitikang sa last 16
CEBU, Philippines — Ang pambato sa Pilipinas nga sila si Dennis Orcollo, Johann Chua, Carlo Biado, ug Rodrigo “Edgie” Geronimo mi-abante sa last 16 knockout stage sa 2021 US Open 9-Ball Championship didto sa Diamond Arena sa Harrah’s Resort Atlantic City sa New Jersey.
Ang gibansagang ’Robocop’ nga si Orcollo mipaluhod ni Oliver Szolnoki sa Hungary, 11-6, aron pag-inat sa perpekto niyang record ngadto sa 5-0 ug pagpaduol ngadto sa usa na lang ka daog gikan sa quarterfinal round ning unom ka adlaw nga torneyo nga nagdalit og kinatibuk-ang $300,000 nga ganti. Si Chua nagpabilin sab nga way pilde human sa lima ka duwa human giwani si Mieszko Fortunski sa Poland, 11-7, aron pagpahayag sa iyang tsansa nga sakmiton ang $50,000 (P2.5 million) nga premyo sa makampiyon.
Si Orcollo, ang 2010 World Pool Mastrs champion ug five-time Southeast Asian (SEA) Games gold medalist, mosuway pag-angkon og luna sa Final 8 sa dihang iyang sangkaon si Mario He sa Austria.
Mao sab ang tumong ni Chua, ang 3rd placer sa World 10-Ball Championship sa miaging semana didto sa Las Vegas, sa pakigharong niini batok ni John Morra sa Canada.
Sila si Orcollo ug Chua giduyogan sa ilang mga kababayan nga sila si Biado ug Geronimo sa sunod nga bahin sa kompetisyon.
Kinahanglan pa hinoon nga tagakon ni Biado ang kauban niining Pinoy nga si Jeffrey de Luna, 11-6, aron pagtikang sa sunod nga hugna, samtang si Geronimo duna pa say pag-asa sa titulo human gipakaging si Niels Feijen sa The Netherlands, 11-6.
Si Biado, ang 2017 world 9-ball champion ug two-time SEA Games gold medalist, makigtige sunod ni David Alcaide Bermudez sa Spain, samtang si Geronimo makig-atbang ni Dennis Grabe sa Estonia.