CEBU, Philippines — Giharos sa managsoong Rommel ug Ronald Ganzon ang nag-unang duha ka puwesto sa 2nd Compostela Mayor’s Cup Open Chess Tournament ning bag-ohay pa lamang didto sa D. M. Reynes Gymnasium sa Compostela, Cebu.
Si Rommel maoy milugwa nga kampiyon human miposte sa kinatas-ang 6.5 puntos sud sa pito ka hugna nga kompetisyon.
Si National Master Ronald Ganzon nagtabla uban sila si Redentor Nailon, Anthony Makinano, Bhell Ortiz, Richard Natividad, ug Marlowe Leyco bitbit ang managsamang 6.0 puntos apan ang igsoon ni Rommel maoy miangkon sa ikaduhang puwesto gumikan sa mas taas niining tiebreaker.
Ang mga Ganzon pulos sakop sa Toledo City Trojans sa Professional Chess Association of the Philippines (PCAP), ang labing unang propesyonal nga liga sa chess sa nasud.
Sa kinatibuk-an, lima ka mga Trojans ang naapil sa nag-unang walo ka dapit sa maong torneyo didto sa Compostela.
Si Nailon mitapos ikatulo, si Natividad ikaunom ug si National Master Rogelio Enriquez, Jr. ikawalo.
Naglangkob sa top 10 uban ang 5.5 puntos mao sila si Rowyn Ontal ug Raymond Abellana.