CEBU, Philippines — Ang Cordova Dutchess Dagami Warriors mitikang ngadto sa Southern Division semifinals samtang ang Toledo City Trojans hingpit nang nanamilit sa Professional Chess Association of the Philippines (PCAP) GM Wesley So Cup niadtong Miyerkules sa gabii.
Ubos sa pagpangu nilang Grandmaster Nitzan Steinberg, National Masters Merben Roque ug Mario Mangubat, ug Woman International Master Bernadette Galas, ang Dagami Warriors ni PCAP vice chairman Ariel Potot mi-sweep sa Surigao Fianchetto Checkmates sa duha nila ka duwa, 13.5-7.5 ug 14-7, aron paglayat sa Final 4.
Ang Cordova mahimong momartsa sa South finals kon ugaling ilang pakgangon ang Negros Kingsmen, nga mi-abante sa semis human gipalagpot ang Zambanga Sultans sa iskor nga 13.5-7.5 ug 12-9.
Lahi hinoon ang nahitabo sa Toledo Trojans, nga mibabay na sa torneyo human gitagak sa Iloilo Kisela Knights sa parehong iskor nga 15-6.
Sangkaon sunod sa Kisela Knights ang All-Filipino Conference South champion Camarines Soaring Eagles alang sa luna sa division championship. Ang Soaring Eagles padayong nanikaysikay human gi-ihaw ang Mindoro Tamaraws, 14.5-6.5 ug 17.5-3.5.