CEBU, Philippines — Si James Harden mirapido og 34 puntos sa iyang triple-double sa dihang gipalagpot sa hingpit sa Brooklyn Nets ang Boston Celtics, 123-109, aron pagtikang sa NBA Eastern Conference semifinals kagahapon didto sa Barclays Center sa Brooklyn, New York.
Gawas sa eksplosibo niyang opensa, si Harden milangkat sab og 10 ka rebounds ug mipasa og 10 ka assists alang sa Nets, nga mihuman sa ilang best-of-seven series batok sa Celtics bibit ang 4-1 nga baraha.
Wala sab magpabitin sila si Kyrie Irving ug Kevin Durant nga nagkumboya og 49 puntos alang sa Nets nga makigharong batok sa Milwaukee Bucks sa kulbahinam nga East semis.
Ang Nets mipabuto og 37 puntos sa katapusang kuwarter dayon na ngadto sa 14 puntos nilang pagtagak sa Celtics.
"We've dealt with so much adversity through the regular season, it felt good to get some meaningful games in. It's time to lock in now," matud pa ni Harden nga nadungagan ang kadasig karon na nag-click na ang Big 3 sa Nets ning playoffs.
Si Jayson Tatum maoy nangu sa pilderong Boston ubang ang 32 puntos. Sila si Evan Fournier ug Romeo Langford nagkumbinar og 35 puntos alang sa Celtics nga nanamilit na sa liga.