CEBU, Philippines — Bug-at nga silot ang nagpaabot sa PBA players, coaches ug personnel kinsa makalapas sa health protocols atol sa practice sessions.
Niadtong Biyernes, ang Inter-Agency Task Force (IATF) nihatag og alibyo sa PBA aron makapahigayon og team practices sa mga lugar nga ubos sa General Community Quarantne (GCQ) ug Modified General Community Quarantine (MGCQ).
Matud ni PBA commissioner Willie Marcial nga iyang padak-an ang multa ug suspensiyon ngadto sa 10 ka adlaw niadtong mga magduduwa nga mapakyas pagtuman sa lagda atol sa praktis.
“Lalakihan natin ‘yan. Hindi lalayo diyan ‘yung penalties natin sa Clark na P100,000. Suspension for 10 days. Malaki ‘yan .. kasi gusto nga natin maging successful,” sumala pa ni Marcial atol sa press conference niadtong Biyernes.
“Hindi naman para sa kanila lang ‘to. Para sa kapwa nila players, kapwa nila teammates, kasama sa team, pamilya nila, at sa pamilya din ng mga team members nila. Sana maintindihan nila,” dugang pa ni Marcial.
Ubos sa closed-circuit set-up, ang mga sakop sa PBA teams hatod-kuha gikan sa balay ngadto sa practice venue.
Ang PBA mopahigayon og praktis sud sa usa ka bulan sa dili pa kini makigkita og balik sa IATF aron mangayo og bendisyon alang sa pagsugod sa ilang bag-ong season.