CEBU, Philippines — Nahibalik na dinhi sa nasud si reigning International Boxing Federation (IBF) super flyweight champion Jerwin Ancajas usa ka semana kapin gikan sa iyang madungganong kadaogan.
Si Ancajas pabiling kampiyon human nilampos pagdepensa sa iyang bakus batok sa Mehikanong si Jonathan Rodriguez pinaagi sa "unanimous decision" niadtong Abril 11 didto sa Mohegan Sun Arena sa Uncasville, Connecticut.
Ang 29-anyos nga si Ancajas niabot sa Ninoy Aquino International Airport (NAIA) diin gisugat siya sa military personnel. Ang garbo sa Panabo, Davao de Norte usa ka reservist sa Philippine Navy.
Si Ancajas nibalik sa iyang yutang natawhan human sa pito ka bulan nga pagpuyo sa Estados Unidos samtang naghuwat sa iyang nadelatar nga title fight batok sa 25-anyos nga si Rodriguez.
Kuyog ni Ancajas sa pag-abot mao ang iyang trainers nga si Joven Jimenez, sparring partner Jonas Sultan ug Olympic-bound Eumir Felix Marcial.