CEBU, Philippines — Nakasagunson og lima ka daog ang Boston Celtics dihang ilang gipahubas ang Los Angeles Lakers, 121-113 sa NBA kagahapon didto sa Staples Center sa Los Angeles, California.
Si Jaylen Brown mihimo og 13 sa iyang unang 14 ka itsa ug miposa og tulo ka 3-pointers sa kinatibuk-an niyang 40 puntos.
Labaw ang Boston, 113-86 sa katapusang siyete minutos sa duwa, sa wala pa pagawasa ni coach Brad Stevens ang iyang starters. Apan sila si Talen Horton-Tucker ug Ben McLemore nangu sa 24-2 run sa Lakers nga nagpuwersa ni Brown ug sa first five sa Celtics pagbalik sa duwa.
Si Brown mipasud sa iyang floater ug jumper sa nahabiling 32 segundos aron mapakgang ang rally sa Lakers.
Sila si Payton Pritchard ug Marcus Smart mitampo'g 15 puntos matag usa alang sa Celtics.
Ang Lakers gipangulohan ni Horton-Tucker nga mihabwa og 19 puntos, gisundan ni Marc Gasol sa iyang season-high 18 puntos. Si McLemore mipasud og 15 sa iyang 17 puntos sa fourth quarter sa iyang home debut sa Lakers.
Sa lain pang mga duwa, si Deandre Ayton miburak og 26 puntos ug 11 ka rebounds, samtang si Devin Booker midugang og 23 puntos sa Phoenix Suns nga midaog ilang ika-10 nga sunod-sunod nga home game pinaagi sa pagpilde sa Sacramento Kings, 122-114 , samtang si Stephen Curry mibugha og 33 puntos aron pangulohan ang Golden State Warriors paglubong sa Cleveland Cavaliers sa iskor nga 119-101.