James miduslit 46 puntos alang sa Lakers
CEBU, Philippines — Daghan kaayong sipyat si Kevin Durant sa iyang mga itsa, apan gitubos kini ni James Harden, kinsa mipasud og 10 sa iyang 20 puntos sa fourth quarter sa dihang gipilde sa Brooklyn Nets ang bisitang Miami Heat, 98-85 sa nagpadayong duwa sa NBA kagahapon didto sa Barclay's Center sa Brooklyn, New York.
Ang Nets nidaog sa ikaunom nga higayon sa walo ka mga duwa diin sila mipasulod og season-low 40 percent, apan ilang na-outscored ang Miami, 20-7 sa kapin siyete minutos sa duwa.
Si Kevin Durant mikabya sab og 20 puntos diin nipasud lang siya og unom sa 21 ka itsa, apan ang iyang 3-pointer gikan sa tuong bahin mibuak sa 78-78 nga panagtabla sa nahabiling 6:47 sa duwa ug sukad niadto ang Nets na ang nikontrolar sa nahabiling mga oras sa duwa.
Misapyaw sab og 16 puntos si Kyrie Irving, samtang si Joe Harris mitampo'g 12 puntos ug si DeAndre Jordan adunay 11 puntos sa Nets nga miinat sa ilang rekord ngadto sa 11-8 sa Eastern Conference.
Si Bam Adebayo maoy nangulo sa tanang scorers sa Heat nga miduslit og 26 puntos uban ang 10 ka rebounds. Mipasud siya og 10 sa 19 ka itsa, apil na ang buzzer-beating 3-pointer paghuman sa third period nga naghatag sa Heat og 71-70 nga labaw. Pero wala siya makahimo og iskor sa katapusang 7:45 sa duwa.
Midagkot og 21 puntos si Goran Dragic sa Heat nga napilde sa ikaunom nga higayon sa walo ka mga duwa.
Ang Heat padayong niduwa nga wala silang Jimmy Butler ug Avery Bradley tungod sa NBA safety protocols.
Didto sa Cleveland, si LeBron James mipakita sa iyang katang-an dihang mipabuhagay kini og 46 puntos, walo ka rebounds ug unom ka assists alang sa 115-108 nga kadaogan sa Los Angeles Lakers batok sa Cavaliers.
Si Anthony Davis mitapos uban ang 17 puntos alang sa Lakers, samtang sila si Dennis Schroder ug Kentavious Caldwell-Pope mitampo'g 10 puntos matag usa. Ang daog nagtukmod sa Lakers balik ngadto sa unang puwesto sa Western Conference standings uban ang 14 ka daog ug upat ka pilde.