CEBU, Philippines — Gipalukapa pag-usab sa Barangay Ginebra Kings ang karibal nilang TNT Tropang Giga, 82-78 sa Game-5 sa ilang "best-of-seven" Philippine Cup finals aron sakmiton ang makasaysayanlong korona sa PBA bubble niadtong Miyerkules sa gabii didto sa AUF Sports Center sa Angeles City, Pampanga.
Si Japeth Aguilar mitabla sa career-high niyang 32 puntos, samtang sila si Stanley Pringle ug LA Tenorio nagkumboya'g 23 puntos alang sa Gin Kings nga mitak-op sa serye sa baraha nga 4-1 aron langkaton ang labing unang nilang kampiyonto sa All-Filipino Conference sud sa 13 ka tuig.
Mao sab kadto ang unang AFC title ni Ginebra coach Tim Cone sukad iyang gitimon ang San Mig Coffee Mixers ngadto sa makasaysayanong 'grandslam' niadtong 2014.
Si Tenorio maoy gibayaw nga Finals MVP gumikan sa impresibo niining salida uban sa Ginebra nga milangkat sa ikaduhang niining sunod-sunod nga titulo human gidominar ang Governor's Cup sa miaging season.
"Championship lang ang wish ko kay God, binigyan pa ako ng bonus," matud pa ni Tenorio.
Ang Ginebra nagmaya sab sa ikaduha nilang "back-to-back" titles sukad sa 2004 Fiesta Conference ug dayon sa Philippine Cup.
Sa kinatibuk-an, mao kadto ang ika-13 nga korona sa Ginebra franchise ug ika-23 alang ni Cone aron pagsemento sa iyang legasiya isip labing bangfiitan nga coach sa kasaysayan sa PBA.