CEBU, Philippines — Hingpit na ang pagbalhin ni Gordon Hayward gikan sa Boston Celtics ngadto sa Charlotte Hornets sa umaabot nga NBA season.
Sa ilang pagbuhi ni Hayward, ang Celtics nakahipos og $28.5 million sa ilang kaban nga ilang magamit pagkuha og dekalibreng free agent kon duna man gani sila'y matripingan.
Ang 30-anyos nga si Hayward duna pa unta'y $34.2 million nga player option sa iyang kontrata aron magpabilin sa Celtics, apan gipili niyang mobalhin sa Hornets pinaagi sa upat ka tuig nga kontrata nga mibalor og $120 million.
Gihangop og maayo ni Charlotte general manager Mitch Kupchak ang pag-abot ni Hayward sa ilang team.
Si Hayward, 10 ka tuig nga beterano sa NBA, mi-average og 15.3 points, 4.4 rebounds ug 3.5 assists sud sa 641 ka regular season games uban sa Celtics ug Utah Jazz.
Si Hayward gihamok og injury sa miaging tulo ka tuig, apan wala kini panumbalinga sa Hornets nga malaumon nga dako og ikatabang si Hayward aron palig-onon ang ilang puwersa.