CEBU, Philippines — Gilumsan sa talentadong Los Angeles Lakers ang batan-ong Denver Nuggets, 126-114 aron pagpadanak sa unang dugo sa ilang "best-of-seven" NBA Western Conference Finals kagahapon didto sa Orlando, Florida.
Si Anthony Davis mitagak og 37 puntos ug milangkat og 10 ka rebounds aron pangulohan ang Lakersmga midaog sa unang higayon sa Game-1 sa miagi nilang tulo ka playoff series.
Laing superstar sa Lakers nga si LeBron James mitampo'g 15 puntos uban ang 12 ka assists ug unom ka rebounds.
Human sa sikit nga unang kuwarter diin ang Nuggets naglabaw og dos puntos, gikastigo sa Lakers ang Denver sa ikduhang kuwarter, 34-21 aron pagposte og 70-59 nga labaw sa halftime.
Nasayod sa kapasidad sa Nuggets nga makabangon human malubong, wala mikompiyansa ang Lakers dayon na ngadto sa pagkulit og impresibong daog. Igo lamang nakasikit ang Nuggets ngadto sa nuybe puntos.
Samtang naggukod, natiwasan pa ang problema sa Nuggets gumikan kay na-foul trouble sila si Nikola Jokic, Jamal Murray ug Paul Millsap.
Sila si Jokic ug Murray nga wala kaayo gamita parehong miiskor og 21 puntos, samtang si Michael Porter midugang og 14 puntos alang sa pilderong Nuggets.
Taliwala sa naglagiting nilang kalampusan, mapaubsanon kaayo si Davis.
"We haven't done anything special," matud pa ni Davis. "We basically took care of home court. We have three more to go."