CEBU, Philippines — Dili na gyud kapugngan ang plano sa Pinoy'ng boksidor nga si Eumir Marcial nga mag-propesyonal.
Atol sa labing uwahing episode sa The Hit List vodcast, si Marcial mibutyag sa damgo niya nga away kon ugaling motikang na siya sa pro.
"Siguro as a middleweight pro no, syempre ang sarap talaga makalaban yung champion diba? Yun yung pinakapangarap natin, yung champion -- si idol Canelo (Alvarez) talaga yung pangarap ko makalaban," matud pa ni Marcial.
Ang Meksikanong si Alvarez, 29, usa ka four-divison world champion ug kausa pa lamang mapilde sa iyang karera. Nagbitbit kini og 53-1-2 uban ang 36 ka daog pinaagi sa knockout.
Apan kay si Alvarez nahimong pro sud sa kapin usa na ka dekada, si Marcial nagtuo nga dili na niya maabtan ang Meksikano kay lagmit moretiro na kini.
"Sa tingin ko... hindi na ako aabot sa kanya kasi medyo matanda na rin siya and ngayon pa lang ako mag-start so medyo late na kung aabot pa kami," dugang pa ni Marcial.
Ang 24-anyos nga si Marcial usa sa upat ka mga Pinoy'ng atleta nga kwalipado na sa Tokyo Olympics sunod tuig. Ang laing tulo mao ang kauban niyang boksidor nga si Irish Magno, pole vaulter EJ Obiena ug gymnast Carlos Yulo.
Nagparamdam nang daan si Marcial kon ugaling mag-pro siya, adto siya magpahigot sa MP Promotions sa idolo niyang si ring superstar Manny Pacquiao.
Bisan og pro na, si Marcial misaad nga prayoridad gihapon niya ang iyang kampanya sa Tokyo Olympics diin iyang buhaton tanan kutob sa iyang mahimo aron tunolan ang Pilipinas sa gihandum niining labing unang gold medal sa Olympics.