Thibodeau gisaytan sa Knicks isip coach
CEBU, Philippines — Taliwala sa pagka-suspenso ning NBA season gumikan sa kalibutanhong pandemya, ang New York Knicks nagpadayon sa pagpangita og bag-ong coach. Ang nag-unang kandidato sa ilang listahan mao si Tom Thibodeau. Ang Knicks mipalagpot ni coach David Fizdale niadtong Disyembre gumikan sa bati nilang sinugdanan diin sila kaupat lamang makadaog sud sa 22 ka duwa.
Sukad niadto, si Mike Miller na maoy nagsilbe nilang interim coach. Duna pa hinuo'y tsansa si Miller nga mahimong head coach, apan si Thibodeau maoy gustong kuhaon ni Knicks president for basketball operations Leon Rose.
Si Thibodeau wala na maka-coach sukad niadtong Enero 2019 sa dihang gitaktak siya isip coach ug presidente sa Minnesota Timberwolves. Sa kinatibuk-an sa iyang karera uban sa Wolves ug Chicago Bulls, si Thibodeau adunay 352-246 win-loss record. Iyang gigiyahan ang Bulls ngadto sa lima ka sagunson nga pagtaak sa playoffs, apil na niini ang pagtikang sa Eastern Conference finals niadtong 2011.
- Latest
