CEBU, Philippines – Giablihan sa Team SPEAK-St. Francis sa Danao City ug Lelah Construction ang ilang kampanya pinaagi sa pagdaog sa 2020 Lou Ornopia Cup Open Basketball Tournament didto sa Calambua covered court sa lungsod sa San Remigio amihanang bahin sa Sugbo.
Si Jay-R Barral maoy nangu sa lima ka players nga mikadlit og double figures uban ang 19 puntos sa dihang gibihag sa SPEAK-St. Francis ang T&T Slasher, 90-87, samtang sila si Mike Patalinjug ug Alje Mendez maoy mga bida sa Lelah Construction nga mibuntog sa Therrish Beach Resort sa Tabuelan, 78-72.
Miiskor si Jojo Pedrano og 13 puntos, samtang sila si Cristian Avila, Cyrel Laurito ug Kevin Doroy milansang og 12 puntos matag usa alang sa SPEAK-St. Francis.
Sa pikas nga aksiyon, si Patalinjug maoy nangu sa Lelah Construction bitbit ang 20 puntos ug gisundan ni Mendez nga dunay 19 puntos. Si Neon Chavez dako sab og natampo sa Lelah uban ang 11 puntos.
Ang unom ka semana nga torneyo nga gituyo aron pagdugang og lamas sa tinuig nga pista sa Calambua agi'g pangilin sa mahal nilang patron San Vicente Ferrer karong Abril 17-18, gipaluyohan sa MS Motosuit inabagan nilang provincial board members Francis Salimbangon ug Kerry Shimura, Vice Mayor Al Pestolante, RMO Motor Parts, MS Motosuit, F&FO Motor Parts, NF Enterprises, LMO Motor Parts and General Merchandise, N-Style, Engr. Susan Ornopia, Mariano De La Peña, Rowena Jubay ug Diosdado Navarez.
Ang mga duwa ubos sa superbisyon ni commissioner Reynante Jubay.