CEBU, Philippines — Unom ka teams ang magtigi alang sa korona sa 2020 Lou Ornopia Cup Open Basketball Tournament nga gipaluyohan sa MS Motosuit nga mosikad karong alas-4 sa hapon didto sa Calambua covered court sa lungsod sa San Remigio amihanang bahin sa Sugbo.
Mga entranteng koponan mao ang Olilab Oil, Inc. ni Jay Olivar, Lelah Construction/SBM Alumni, Saint Francis-Danao ni Ryan Perez, T & T Slasher ni Loloy Tagalog, Team Mabuhay ni Mamai Arnado ug Tabogon PNP ubos sa pagpangu ni P/Lt. Luciano Autida Fuentes.
Moduwa sila og single round robin, diin ang top 4 moabante sa crossover semifinals. Ang mga manananaog maoy mag-ilog sa titulo sa tagakay nga finals.
Gawas sa tropeyo, ang makampiyon mobulsa og P20,000 samtang ang mopahiluna sa ikaduha ug ikatulong dapit makadawat og P15,000 ug 10,000. Duna sa'y espesyal nga premyo nga itunol sa Most Valuable Player, Mythical Five ug Sportsmanship awardee.
Ang usa ka bulan nga torneyo nga gituyo aron pagdugang og lamas sa tinuig nga pista sa Calambua agi'g pangilin sa minahal nilang patron nga si San Vicenter Ferrer karong Abril 17-18, gipaluyohan nilang provincial board members Francis Salimbangon ug Kerry Shimura, vice mayor Al Pestolante, RMO Motor Parts, MS Motosuit, F&FO Motor Parts, NF Enterprises, LMO Motor Parts and General Merchandise, N-Style ug Diosdado Navarez.
Ang tanang mga duwa ubos sa superbisyon ni Reynante Jubay.