CEBU, Philippines – Dili maayong balita ang mihapak sa kampo San Miguel Beermen tungod sa seryosong injury nga naangkon sa ilang star player nga si June Mar Fajardo.
Ang mga kadagkoan sa Beermen mipahibalo nga ang Cebuano center giingong naliki ang bukog tuo niining tiil atol sa team practice pangandam sa bag-ong season sa PBA nga buksan sunod bulan.
Si Fajardo gipaubos sa operasyon ug pipila ka bulan siya nga mawala. Posible nga dili siya kaduwa sa kinatibuk-an sa All-Filipino Cup.
Sa maong hitabo, si San Miguel coach Leo Austria miangkon nga kuwang sila sa bigman ug magtigom sila sa mga coaches aron masolusyonan kini.
Sa pagka karon, ang Beermen aduna la'y usa ka lehitimong sentro nga si Mo Tautuaa kinsa nakuha sa koponan gikan sa NorthPort Batang Pier bugti ni Fil-German Christian Standhardinger.
Ang ilang veteran nga si Yancy De Ocampo paingun na sa retirement, samtang si Kelly Nabong bag-o lang nila gibuhian pinaagi usab sa trade.