CEBU, Philippines – Gisaytan ni kanhi welterweight world champion Danny Garcia (35-2, 21KOs) sila si Manny Pacquiao ug Errol Spence sa tinguha nga makabalik sa iyang trono.
Apan sa dili pa siya maghuna-huna niini, kinahanglan una nga dispatsahon ni Garcia ang Ukranian niyang karibal nga si Ivan Redkach (23-401, 18KOs) sunod semana.
Kon ugaling iyang mapilde si Redkach karong Enero 25 didto sa Barclays Center sa New York, dako'g tsansa nga makaangkon si Garcia og katungod nga mohagit ni Spence (26-0, 21KOs), ang wala pa'y pildeng WBC ug IBF champion.
Apan si Garcia nakalinya sab isip usa sa mga posibleng makontra ni Pacquiao sa pagbalik niini og away karong Abril o Hulyo.
Miangkon si Garcia nga si Pacquiao, ang kasamtangang WBA champion, usa sa iyang mga paborito nga makasangka sa umaabot.