CEBU, Philippines — Wala moila og higala ang Unisol ug ilang gilubong og maayo ang 1 Med, 100-74 sa Sunday.com 6th Conference League niadtong Miyerkules didto sa Benedicto gym sa A.S. Fortuna St., Mandaue City.
Kuyaw kaayong nakaduwa si Jerico Cortes ug gipangulohan ang Unisol pinaagi sa iyang 21 puntos.
Wala sab magpaalkansi si Rex Tuazon nga miamot og 19 puntos ug ingon man sila si Jay-R Dela Peña ug Merben Iñigo nga mitimbre'g 15 ug 14 puntos sa Unisol nga sayo kaayong nakapanemaho og daog dihang miposte kini og 71-44 nga labaw human sa third quarter.
Nanginit og maayo ang Unisol sa fourth period aron bingaton ang ilang dakong labaw nga nakapaluya sa 1 Med nga gipangulohan ni Kristian Sanchez nga mipabuhagay og 14 puntos.
Laing naka-double figures sa 1 Med mao sila si Vinchie Sesaldo nga adunay 13 puntos, Nielfred sa iyang 12 puntos ug Wendel Suico nga mikamada og 11 puntos.
Sa laing duwa, ang Yamaha midaog sab dihang ilang gilapa ang Half Baked, 89-82.
Gipangulohan ni Mark Ramirez ang kadaogan nga miratsada og 25 puntos, gisundan ni Alfred Pasana nga mikambiya og 13 puntos ug Lourince Co sa iyang 10 puntos.
Tulo sab ka Half Baked players ang miiskor og double figures pinangulohan ni Ryan Noval nga mihaon og 21 puntos, gisundan ni Wordy Lopez sa iyang 17 puntos ug Jose Manzanares nga adunay 11 puntos.
PUNTOS MATAG USA
Unang duwa:
YAMAHA (89) – Ramirez 25, Pasana 13, Co 10, Paspie 9, Soco 8, Castro 8, Vergacer 6, Cabasa 4, Cuer 2, Tirado 2, Biosano 2.
HALF BAKED (82) – Noval 21, Lopez 17, Manzanares 11, K. Cabahug 9, Cortes 7, Remulta 6, A. Cabahug 5, Sampang 4, Solon 1, Peligrino 1.
Ikaduhang duwa:
UNISOL (100) – J. Cortes 21, Tuazon 19, Dela Peña 15, Iñigo 14, Muñez 8, Flaminia 8, Bercero 5, Arano 4, Espija 4, Gela 2.
1 MED (74) – Sanchez 14, Sesaldo 13, Bacus 12, Jordan 11, Suico 8, Besabella 8, Alindajao 3, Cutamora 3, Labrador 2.