Mayweather nagparamdam nga mobalik og boksing
CEBU, Philippines — Gipahibalo ni Floyd Mayweather Jr. nga mobalik siya sa pro boxing unya sa tuig 2020.
Mao kini ang gipasiatab ni Mayweather sa labing uwahi niining post sa iyang Instagram.
"Coming out of retirement in 2020," segun pa sa iyang post.
Katapusang miaway si Mayweather sa usa ka pro boxing match batok ni UFC star Connor McGregor niadtong 2017. Pagka sunod tuig, nakigsangka siya ni kickboxer Tenshin Nasukawa sa Japan sa usa ka exhibition bout.
Sa iyang pagretiro, si Mayweather nagbitbit og 50-0, uban ang 27KOs.
Bisan pa man og mipahuway na siya sa boksing, daghan gihapon ang naghandum sa rematch nilang Manny Pacquiao. Nunot sa labing uwahing pamahayag ni Mayweather, miulbo gilayon ang mga espekulasyon nga lagmit mabuhi og balik ang mga tabi-tabi kabahin sa ikaduha nilang sangka sa Pinoy niyang karibal.
- Latest
