CEBU, Philippines — Giinat sa Houston Rockets ang sagunson nilang daog ngadto sa walo ka duwa human nilang gilubong ang Portland Trail Blazers, 132-108 sa NBA kagahapon didto sa Toyota Center sa Houston, Texas.
Si James Harden miiskor og 36 puntos, samtang si Russell Westbrook mirehistro og 'triple-double sa maong daog.
Lab-as pang mihaw-as gikan sa 49 puntos nga eksplosyon atol sa ilang daog batok sa Minnesota Timberwolves niadtong Domingo, dominante na sab kaayo ang two-time scoring champion nga mipupo sab og unom ka rebounds ug lima ka assists.
Ang makalisang kay si Westbrook nagmangtas sab sa kampo sa Rockets uban ang 28 puntos, 13 ka rebounds ug 10 ka assists.
Ang Rockets nagbitbit na karon og 11-3 record nga maoy ikaduhang labing nindot sa Western Conference sunod sa nagharing Los Angeles Lakers nga dunay 11-2 nga baraha.
Si C.J. McCollum mitali og 25 puntos, apan si Damian Lillard na-angklahan ngadto sa 13 puntos alang sa Blazers nga natagak ngadto sa 5-9.
Sa laing duwa, si Giannis Antetokounmpo mipabuhagay og 33 puntos, 10 ka rebounds ug tulo ka steals sa dihang gisungag sa Milwaukee Bucks ang Chicago Bulls, 115-101.
Sila si Brook Lopez ug Donte DiVincenzo nagkumboya'g 34 puntos alang sa Bucks nga mi-inat sa ilang marka ngadto sa 10-3 sa Eastern Conference.
Didto sa Toronto, sila si O.G. Anunoby ug Pascal Siakam mituboy sa Raptors ngadto sa 132-96 nga demolisyon sa Charlotte Hornets.
Si Anunoby miposte og 24 puntos samtang si Siakam midonar og 20 puntos alang sa defending NBA champion.