CEBU, Philippines — Si Carmelo Anthony nga wala na makaduwa kapin usa ka tuig sukad siya gipabakwit sa Houston Rockets, mipirma og kontrata uban sa nagkagidlay nga Portland Trail Blazers.
Ang 35-anyos nga si Anthony katapusang nakapakita og aksiyon niadtong Nobiyembre 8, 2018 diin siya mipasud og usa sa 11 niya ka itsa ug miiskor lamang og dos puntos sa 98-80 nga kaparotan sa Rockets batok sa Oklahoma City Thunder.
Sa kinatibuk-an, si Anthony walo lamang ka higayon nga nakaduwa sa Rockets sa wala pa siya gitangtang sa ilang line-up hangtod nga gi-trade sa Chicago Bulls niadtong Enero 2019.
Wala gyud makaduwa si Anthony sa Bulls nga mibuhi sab dayon niya usa ka bulan ang milabay.
Kay napunta karon sa Blazers, mao kini ang ikalimang team ni Anthony sukad niadtong 2016.
Dako nga hagit ang nag-atang ni Anthony sa unahan ilabi kay ang Blazers nangiwit karon sa Pacific Division kay kaupat pa makadaog sud sa 12 ka mga duwa.