CEBU, Philippines – Ang Purefit Gym nagsalig sa ilang fourth quarter rally nga maoy gihimo nilang hinagiban paglumpag sa Pub Gee Resto Bar, 92-86 sa FYA Basketball Tournament Season 24 Soontit Construction Cup 2019-2020 niadtong Martes sa Atillo gym sa Punta Princesa, Dakbayan sa Sugbo.
Miagi pa hinuon og tunukon nga dalan ang Purefit Gym una nila mataak ang kutas nga kadaogan kay sila man ang naggukod sa nag-unang tulo ka kuwarter.
Kuyaw kaayong nakaduwa si Wilson Gabucan ug gipangulohan ang Purefit Gym pinaagi sa iyang 29 puntos ug 14 ka rebounds. Mihimo sab siya og lima ka assists ug tulo ka steals aron mahimong best player of the gym.
Ang team manager nga si Mclain Alkuino mipakita sab sa iyang abilidad nga mibagnos og 25 puntos sa Purefit Gym nga mao gihapon ang nag-una sa standing bitbit ang 3-0 nga baraha. Laing naka-double mao si Jim Jim Rara sa iyang 16 puntos.
Ang Pub Gee Resto Bar ni Boyet Duran gipangulohan ni Jessie Boy Condrilon nga mikadlit og 22 puntos, gisundan ni Benz Patricio nga adunay 18 puntos ug Dave Caballes sa iyang 14 puntos. Sila si Juvinelle Enriquez ug Isyot Regudo mitampo'g 10 puntos matag usa sa Pub Gee Resto Bar nga nangiwit sa standing sa ilang 0-3 record.
Sa laing aksiyon, ang Masterline milansang sa ikaduha nilang daog human makaipsot sa Central Ice Cream/Nevaeh Sales Trading, 80-76.
Gipangulohan ang Masterline ni Socrates Aglipa pinaagi sa iyang 22 puntos, duha ka rebounds ug upat ka assists nga nakapahimo kaniya isip best player of the game. Nakatampo sab og dako si Francis Paracuelles nga mihirit og 16 puntos ug si Dandan Bocado nga dunay og 10 puntos.
Nagtabla ang iskor sa third period, 54-all nga maoy pabilo pagpainit ug nakapahinam sa duwa. Diha na midistansiya ang Masterline ni Noel Medalle sa hinapos nga bahin sa aksiyon.
Ang Central Ice Cream/Nevaeh Sales Trading nilang Jopel Tejada ug Noel Medalle gipangulohan ni Emman Reubal nga mikandos og 25 puntos. Si Dodie de Gracia mitakos og 16 puntos sa nadisgrasyang koponan nga nalabay sa ikaunom nga dapit sa ilang 1-2 nga baraha.
PUNTOS MATAG USA
Unang duwa:
PUREFIT GYM (92) – W. Gabucan 29, M. Alkuino 25, J. Rara 16, K. Pepino 8, V. Ramirez 6, A. Montillero 4, A. Dante 2, G. Aguilar 2.
PUB GEE (86) – J. Condrilon 22, B. Patricio 18, D. Caballes 14, J. Enriquez 10, I. Regudo 10, J. Silvano 6, A. Regudo 4, A. Villarosa 2.
Ikaduhang duwa:
MASTERLINE (80) – S. Aglipa 22, F. Paracuelles 16, D. Bocado 10, J. Jabonero 6, S. Lumagbas 6, R. Perami 6, C. Malicay 6, J. Eriso 3, J. Engaling 3, G. Tandoy 2.
CENTRAL ICE CREAM (76) – E. Reubal 25, D. De Gracia 16, J. Angkos 8, K. Dela Peña 8, N. Medalle 6, J. Enriquez 4, T. Marata 2, D. Miano 2, M. Ancla 2, T. Abella 2, R. Tabares 1.