CEBU, Philippines — Gibasura ni Richard Schaefer ang posibilidad sa pagretiro sa boksing ni kanhi bantamweight champion Nonito ‘The Filipino Flash’ Donaire Jr. human sa iyang unanimous decision nga kapildihan batok ni Japanese star Naoya Inoue niadtong Huwebes.
Imbes nga moretiro, si Schaefer, ang promoter ni Donaire nagtuo nga mas daghan ug dagko pang mga away ang moabot ngadto sa kanhi five-division world champion tungod sa iyang nindot nga gipakitang labok batok sa wa’y pildeng Hapon nga si Inoue.
Si Donaire nga mihatag ni Inoue og lisud nga sangka sa wala pa mapilde sa ilang IBF, WBA belts ug Muhammad Ali Trophy, posible nga makakuha pa og laing title shot sa bantamweight o mosaka sa mas bug-at nga dibisyon.
“With this fight and this performance, many doors opened for Nonito,” matud pa ni Schaefer sa Philippine STAR News Service. “Nonito will take a well-deserved rest with his family then we’ll sit down and discuss the different options, either at this weight (118 pounds) or maybe, at a higher weight.”
Ang 37-anyos nga si Donaire walay kulba nga nakigsinukliay og kumo sa Japanese knockout artist nga kapila natay-og human maigo sa kusog nga suntok. Natumba hinuon si Donaire sa 11th round, apan nakabangon ug nakatiwas pa kini sa 12 ka hugna nga kumbati ibabaw sa ring.