MYBL-Cebu kasado na
CEBU, Philippines —Andam na ang tanan alang sa MVPSF Youth Basketball League-Cebu (MYBL Cebu) nga mosikad karong Domingo diha sa Magis Eagles Arena sa Sacred Heart School-Ateneo de Cebu sa Canduman, Mandaue City.
Ang MYBL-Cebu usa ka panag-alyansa sa MVP Sports Foundation ug Cebu Youth Basketball League (CYBL). Pormal kining gisilyohan nilang MVPSF President Al Panlilio ug CYBL tournament director Rico Navarro.
Miabot ngadto sa 109 ka teams ang mopakita'g aksiyon ning torneyo nga maoy main event sa ika-12 nga season sa CYBL.
Gilangkuban kini og tulo ka mga age groups: Under 12, 15, ug 18. Ang tanang age groups dunay duha ka dibisyon, Division 1 alang niadtong mga lig-on nga teams ug ang Division 2 alang sa mga developmental teams.
Mga teams nga nangapil nagagikan sa mga tunghaan, ballclubs ug LGU-based squads. Ang torneyo nga matapos sa Abril 2020, ipahigayon sa nagkadaiyang mga binyu sama sa Sacred Heart School Mango Avenue campus, SMS-Boystown, Aznar Coliseum, Talisay City Sports Complex, USC South, USPF, ug SHS-Ateneo de Cebu Canduman.
- Latest
