CEBU, Philippines — Mipraktis na si Christian Standhardinger uban sa bag-o niyang team nga NorthPort Batang Pier kagahapon.
Ang pagsalmot ni Standhardinger mipapas sa kabalaka ni NorthPort coach Pido Jarencio dihang wala dayon mipakita ang Fil-German sa ensayo sa NorthPort niadtong Martes.
Si Jarencio miingon nga nindot ang gipakita ni Standhardinger sa unang ensayo ug giatngan niya ang pagpakita unya sa abilidad sa kanhi No. 1 draft pick.
Naghinam-hinam na sab si Jarencio sa scoring tandem nga pormahon nila ni Standhardinger ug star rookie Robert Bolick.
Interesante usab tungod kay ang gipangandaman sa Batang Pier mao ang sunod nilang duwa batok sa San Miguel Beermen, ang kanhi koponan ni Standhardinger karong Oktubre 23.
Ang NorthPort mibuhi ni Fil-Tongan Mo Tautuaa aron ilang makuha si Standhardinger.