Baby Webmasters 7-0 na
CEBU, Philippines — Si Isaiah Blanco miiskor og 11 sa iyang 15 puntos sa second half sa dihang gilatigo sa University of Cebu (UC) Baby Webmasters ang Don Bosco Greywolves, 63-50 aron pagpabiling walay pilde sa 19th Cebu Schools Athletic Foundation, Inc. (CESAFI) men's basketball tournament sa Cebu Coliseum kagahapon.
Si Blanco, anak ni kanhi PBA star Dondon Hontiveros nga karon konsehal na sa Dakbayan sa Sugbo, milangkat sab og 13 ka rebounds ug mipasa og lima ka assists. Si King Balaga midugang og 12 puntos ug unom ka rebounds alang sa Baby Webmasters nga miinat sa walay pilde nilang ratsada ngadto sa 7-0.
Wala na molingi pa ang Baby Webmasters sukad misutoy ngadto sa 39-29 nga labaw sa halftime.
Si Vincent Escobido dunay 13 puntos alang sa Greywolves nga nadakin-as ngadto sa 4-4.
Sa sayo pa, si Albert Sacayan mitali og 15 puntos ug si Franzel Basalo miamot og 12 puntos aron pangulohan ang University of the Visayas (UV) Baby Lancers ngadto sa 80-57 nga demolisyon sa Southwestern University (SWU)-Phinma Baby Cobras.
Wala na'y duda ang resulta sa duwa human ang Baby Lancers miabante og 24 puntos human sa first half sa iskor nga 38-24.
Ang Baby Lancers nagbitbit na karon og 6-2 record, samtang ang Baby Cobras nakatilaw sa ikalima nilang pilde sud sa pito ka duwa.
- Latest
