CEBU, Philippines — Panimalos maoy tuyo sa Southwestern University (SWU)-Phinma Cobras sa dihang ilang sangkaon pag-usab ang Cebu Institute of Technology-University (CIT-U) Wildcats sa 19th Cebu Schools Athletic Foundation, Inc. (CESAFI) men's basketball tournament karong adlawa diha sa Cebu Coliseum.
Atol sa una nilang engkuwentro niadtong Septiyembre 28, ang Cobras gipakuratan sa kanhi wala pa'y daog nga Wildcats, 62-67.
"CIT played well, while we played so badly," matud pa ni Southwestern U head coach Mike Reyes kabahin sa makapakugang nilang kapildihan.
Dali hinuon nga nakabangon ang Cobras pinaagi sa pag-angkon og 66-61 nga daog batok sa University of San Carlos (USC) Warriors niadtong Oktubre 6 aron putlon ang duha ka sagunson nilang pilde ug inaton ang ilang rekord ngadto sa 5-2.
Gawas nga pahugtan ang ilang pagkupot sa ikaduhang dapit sa liderato, naglungot-lungot sab nga mobawos ang Cobras batok sa Wildcats sa ilang bugno sa alas- 3:30 p.m. sa hapon.
Sa main game sa alas-5 sa hapon, ang University of Cebu (UC) Webmasters moabli sa ilang kampanya sa ikaduhang hugna sa eliminasyon batok sa University of San Jose-Recoletos (USJ-R) Jaguars.
Ang Webmasters ug Jaguars lab-as pang mihaw-as gikan sa impresibong kadaogan niadtong Oktubre 5.
Ang Webmasters milampurnas sa Wildcats, 79-66 aron tablahon ang ilang marka ngadto sa 3-3, samtang Jaguars mipayaka sa University of Southern Philippines Foundation (USPF) Panthers, 77-61 alang sa ikaduha nilang daog sud sa pito ka aksiyon.
Sa juniors division, ang UC Baby Webmasters mosuway og inat sa wa'y pilde nilang ratsada ngadto sa pito ka duwa sa ilang pakigharong sa Don Bosco Greywolves sa alas-2 sa hapon, samtang ang University of the Visayas (UV) Baby Lancers makigtigi sa SWU-Phinma Baby Cobras sa pasiunang duwa sa alas-12:30 sa udto.
Ang Baby Webmasters nagbitbit og perpektong 6-0 nga marka, samtang ang Greywolves miinat sa ilang baraha ngadto sa 4-3 human gibuntog ang Baby Lancers.
Ang Baby Lancers kasamtangan karong nagtabla ug ang USPF Baby Panthers sa ikaduhang dapit sa liderato bitbit ang managsamang 5-2 records, samtang ang Baby Cobras kaduha pa makadaog sud sa unom ka duwa.