CEBU, Philippines – Pagdayeg inay kasaba ang gibawos ni US Team coach Gregg Popovich sa iyang players bisan pa sa sakit nilang kapildihan sa semifinals batok sa France, 79-89 sa World Cup niadtong Miyerkules sa China.
Ang legendary coach mapasigarbuhon sa iyang koponan ilabi na nga mga players niya mipakita og determinasyon bisan pa sa mga kakulian nga nasugatan sa Team USA atol sa ilang preparasyon. Dili usab kamahay si Popovich gumikan kay wala moduwa ang mga superstars sama nilang LeBron James, Kawhi Leonard, Stephen Curry, James Harden, Anthony Davis, Russell Westbrook ug Paul George.
Dugang ni Popovich nga ang nahitabo sa China magsilbe nga leksiyon sa US Team organization ug gipaabot nga mobalik kalig-on ang maong team sa 2020 Tokyo Olympics ug 2023 FIBA World Cup diin ang Pilipinas usa sa mga host.