CEBU, Philippines – Nakakita na og import ang Alaska Aces nga ikapuli ni kanhi NBA cager Branden Dawson.
Dili makaduwa si Dawson sa PBA Governors' Cup kay milapas kini sa height limit nga 6-foot-5.
Nagkara-kara og pangita ang Aces og import ilabi nga 10 ka adlaw na lang sa dili pa buksan ang katapusang conference karong nga season nga PBA.
Gikuha sa Aces ang kanhi collegiate standout nga si Justin Watts isip reinforcement.
Ang 29-anyos nga si Watts miabot niadtong Lunes sa gabii ug gikatakdang mosalmot kini sa team practice sa Alaska ubos sa bag-o nilang coach nga si Jeffrey Cariaso.
Si Watts dili kaayo sama kasikat ni Dawson, apan usa siya ka veteran import nga nakaduwa na sa Poland, Mexico, Japan, Uruguay, Netherland, Qatar, Lithuania ug Switzerland.
"He's more of a wing than post guy and that's gonna put pressure on our bigs, which is exactly the idea," matud pa ni Cariaso sa Sports5.
Si Watts gipaabot nga mopakita sa iyang labok sa himuon tune-up games sa Alaska batok sa NorthPort Batang Pier ug Blackwater Elite karong semanaha.