CEBU, Philippines — Miarangkada na sab ang defending champion EF Suprlus aron magpabilin nga walay pilde sa Consolacion Lilo-an Basketball Association (CELBA) Season 3.
Ang EF Surplus milubag sa Gyro Steel, 69-55 niadtong Huwebes sa gabii didto sa GT Academy gym sa Tayud, Lilo-an.
Gipangulohan na sab ni playing team owner Fury 'Triggerman' Trazona ang EF Surplus nga mipatuasik og 25 puntos.
Si Trazona nakakuha sab og maayong suporta gikan nilang Tata Betinol ug Arprel Sabang nga nagkumbinar og 28 puntos.
Sa kasamtangan, ang EF Surplus nagtangag na og 3-0 nga baraha.
Tulo sab ka players sa Gyro Steel ang miiskor og double figures sa pagpangulo ni Lamadora nga miariya og 24 puntos, gisundan nilang Illustrisimo ug Mondejar nga adunay 13 ug 10 puntos matag usa.
Human magtabla ang iskor sa first quarter, 12-all, ang EF Surplus hinay-hinay nga miarangkada sa second period ug ilang na-outscored ang Gyro Steel, 22-14 aron moabante og otso puntos sa halftime, 34-26. Sukad niadto kontrolado na nila ang duwa hangtod naangkon ang 14 puntos nga kadaogan ning maong liga nga gipasiugdahan sa presidente niining si Arnold Labustro ug bise presidente Henry Agbon.
Ang mga duwa nga ubos sa superbisyon ni league commissioner Fury Trazona, gipaluyohan sa Union Galvasteel ug JJ Surplus.
PUNTOS MATAG USA
EF Surplus (69) – Trazona 25, Betinol 16, A. Sabang 12, Sabang 4, Ponce 4, Pepito 4, Caballes 4.
GYRO Steel (55) – Lamadora 24, Illustrisimo 13, Mondejar 10, Cal 5, Joaquin 4.