CEBU, Philippines – Gihambat sa Executive Boutique/Select Voicecom Bulldogs ang Cognizant Tech Solutions Tikas, 58-48 aron pagkulit sa labing una nilang sa kasaysayan sa CSCC E-Leagues for Basketball niadtong weekend didto sa City Sports Club-Cebu gym.
Sila si Aristotle Alcos ug Yvesse Carlo Suan nagkumboya'g 26 puntos alang sa Bulldogs nga misanta na gyud sa 26 ka sagunson nilang pilde sa EVO League. Wala sila'y bisan usa ka daog sud sa 24 ka duwa sa tulo ka sunod-sunod nga seasons niadtong 2011 ngadto sa 2013.
Si Ricky Raf Espanueva miamot og nuybe puntos, samtang si Ignatius Mark Loyola nalimitahan ngadto lamang sa tres puntos, apan milangkat og 13 ka rebounds, upat ka assists alang sa Bulldogs nga miputol sa duha ka sunod-sunod nilang pilde ning Tanduay Athletics CSCC E-Leagues for Basketball Season 15.
Sa uban pang mga duwa sa EVO League, ang Dynata Warriors milubong sa Demand Science Paladins, 63-47, ang Iploy Barracudas mipilde sa Medspecialized Unicorns, 71-63, samtang ang Tech Mahindra Tech Mighties mibuntog sa Amazon Aces, 77-69.
Sa Elite Classic, si Jan Michael Auditor miiskor og 26 puntos aron pangulohan ang defending champion Sykes Pioneers ngadto sa 93-50 nga pagmasaker sa ePerformnax Reds, si Admir Batiancila mitimbre og 18 puntos sa dihang gipahilom sa Concentrix Converters ang Dreamscape Lions, 75-64, samtang sila si Aldene Jay Batino, Archie Brian Batua, Sherwin Resilla ug Ryan Veloso nagkumbinar og 52 puntos sa dihang gilumsan sa Accenture Sharks ang QBE Generals, 75-54.