CEBU, Philippines – Nakompleto na ang mga koponan sa semifinals dihang ang Harold's Hotel ug Yoyi's Pastries & Desserts mipalagpot sa tagsa-tagsa nila ka kaabtang sa knockout quarterfinals sa FYA Season 23 Basketball Tournament Yoyi's Pastries & Desserts Cup 2019 niadtong Martes didto sa Atillo gym sa Labangon, Dakbayan sa Sugbo.
Ang Harold's Hotel mipilde sa District-7 Resto Bar sa iskor nga 76-62, samtang ang Yoyi's Pastries & Desserts milubong sa Nevaeh Sales Trading, 105-86.
Sila si Ryan 'The Skycraper' Dacayana ug Jade Ursal parehong miantog og 15 puntos. Gawas puntos, si Dacayana milangkat sab og 15 ka rebounds, walo ka assists ug unom ka blocks hinungdan nga siya ang nahimong best player of the game.
Mikawat sab og salida silang Baeng Medalle ug McLain Alkuino nga miamot og 11 puntos matag usa alang sa Harold's Hotel ni Arnel Trinidad, kansang gamay'ng labaw namintinar hangtod nahuman ang duwa.
Miiskor unta og 30 puntos si Francois Paracuelles, apan anugon lang kay wala sila makalahutay sa hugot nga kumbati.
Si Jim Jim Rara miambit og 12 puntos sa District 7 nilang Rady Abarintos ug Sammy Babatid.
Sa laing bahin, ang best player nga si Jao Rabadon miposa og 29 puntos nga gilamasan og pito ka rebounds ug pito sab ka assists aron mangu sa scoring sa Yoyi's Pastries & Desserts.
Ang team manager nga si Ahlmark Albarracin mikandos og 16 puntos sa iyang koponan, samtang si Joshua Salvador adunay 10 puntos sa maong daog.
Tulo sab ka Nevaeh players ni Jofel Tejada ang mirehistro og double digits gipangulohan ni Emman Reubal nga mihakot og 23 puntos, gisundan ni Val Ramirez nga adunay 18 puntos ug Kier dela Peña sa iyang 12 puntos.
Ang semifinals duwaon karong Domingo.
PUNTOS MATAG USA
Unang duwa:
HAROLD's Hotel (76) – Dacayana 15, Ursal 15, B. Medalle 11, Alkuino 11, C. Arnado 7, A. Flores 6, C. Villacastin 4, J. Cabañez 3.
DISTRICT 7 (62) – Paracuelles 30, Rara 12, J. Enriquez 6, Sy 6, M. Ancla 5, Cabasan 3.
Ikaduhang duwa:
YOYI's Pastries (105) – Rabadon 29, Albarracin 16, Salvador 10, J. Aglipa 8, Hanginon 8, B. Aglipa 7, Lucaberte 7, Ursal 6, Cababahay 5, Martinez 4, S. Enriquez 3, Mata 2.
NEVAEH (86) – Reubal 23, Ramirez 18, Dela Peña 12, J. Enriquez 9, R. Tabares 7, Tejada 6, Marata 5, T. Abella 2, Demol 2, Navarro 2.