CEBU, Philippines – Namungingi og NBA players ang Team Australia alang sa FIBA World Cup nga gikatakda karong Septiyembre didto sa China.
Ubos sa pagpangu ni Ben Simmons sa Philadephia 76ers, ang Australia Boomers gilangkuban sab nilang Andrew Bogut sa Golden State Warriors, Joe Ingles sa Utah Jazz, Patty Mills sa San Antonio Spurs ug Jonah Bolden sa Sixers.
Mao kini ang labing lig-ong nga puwersa sa Australia nga mopakita'g aksiyon sa World Cup.
"No doubt, we have the opportunity to put a great team on the floor and that's exciting," matud pa ni Boomers head coach Andrej Lemanis.
Ang final 12 players nga malakip sa Team Australia unya pa hinuon mahibaw-an sa Agosto atol sa ilang training camp.
Nianang bulana, ang Boomers makigharong batok sa Canada ug Team USA sa duha ka tune-up games didto sa Perth ug Melbourne.
Pormal nga sugdan sa Australia ang ilang kampanya sa World Cup batok sa Canada karong Septiyembre 1 didto sa China.