CEBU, Philippines — Nakita ni Frank Vogel, ang bag-ong coach sa Los Angeles Lakers nga ang kagubot tali sa kadagkoan sa team ang hinungdan sa unom ka tuig nga pagkapakyas pagsulod sa koponan sa playoffs.
Si Vogel nga gitudlong coach sa Lakers sa miaging semana nagkanayon nga kuwang sa panaghiusa ang tibuok koponan ug dako kini og epekto sa sunod-sunod niining kapakyasan.
Ang 45-anyos nga si Vogel sayod nga ang panagbangi ni kanhi Lakers president Magic Johnson ug ubang kadagkoan sa koponan ang rason sa paghawa niini ug nanghinaut siya nga dili na kini mausab karon nga siya na ang coach.
Si Vogel masaligon nga mapalig-on na sa Lakers organization ilang sistema ug andam siya nga makigtambayayong sa mga magduduwa ilabi na ni LeBron James aron ibalik sa playoffs ang koponan.