CEBU, Philippines — Gisubhan dayon og daog ang Fighters ug Mt. Carmel batok sa tagsa-tagsa nilang kaatbang sa una nilang duwa sa Liga sa Carmen sa miaging weekend didto sa Carmen gym sa amihanang bahin sa Sugbo.
Ang Fighters midaog sa Pier sa iskor nga 102-92, samtang ang Mt. Carmel nakaikyas uban ang 91-87 nga daog batok sa Buyo.
Ang best player nga si Jake Sanico maoy topscorer sa Fighters nga mibagnos og 27 puntos, gisundan nilang Christian Bejoc ug Lester Bongo nga mipugnit og 16 puntos matag usa sa ilang koponan nga maoy midiktar sa duwa gikan sa pagsugod hangtod sa katapusang gutlo.
Lima sab ka players sa Pier ang miiskor og double figures pinangulohan ni Mark Zamodio sa iyang 20 puntos. Ang laing upat mao sila si Nick Gingco, Jetro Sabio, Tyril Cabarles ug Jovel Salazar.
Sa laing bahin, si Tom Adolfo mikandos og 16 puntos aron mangu sa balanseng opensa sa Mt. Carmel. Gumikan sa iyang maayong salida, siya maoy napiling best player of the game.
Nausik lang ang 35 puntos ni Fralan Caputolan kay nasugamak man ang Buyo ning maong liga nga giorganisar sa Thirdy's Jersey ug sa SK Federation ubos sa liderato ni Jether Lacno.
PUNTOS MATAG USA
Unang duwa:
FIGHTERS (102) - Sanico 27, Bejoc 16, Bongo 16, Abella 15, Davidon 12, Pono 5, Pua 3, Calipay 2, Watin 2, Barcelona 2, Buot 2.
PIER (92) - M. Zamodio 20, Gingco 17, Sabio 16, Cabarles 12, Salazar 11, Flores 4, D. Zamodio 4, Fernandez 3, Maningo 3, Abangan 2.
Ikaduhang duwa:
MT. CARMEL (91) - Adolfo 16, Arecayos 14, Singson 12, Capuyan 12, Jayson 10, Prospero 10, Bejoc 4, I. Kiamco 4, R. Kiamco 3, Jem. Castro 2, Jes. Castro 2, Binoliano 2.
BUYO (87) - Caputolan 35, Rosales 13, Lugto 11, Ruiz 10, Delan 7, Herwin Sususco 7, Herbert Sususco 4.