CEBU, Philippines — Laing rekord nga lisud tupngan ang suwayan og kab-ot ni reigning MVP JuneMar Fajardo sa San Miguel Beermen.
Kini human siya ang nag-una sa mga kandidato alang sa 'Best Player of the Conference' sa All-Filipino Cup. Kun makuha kini sa Sugboanong sentro, siya na ang adunay labing daghan nga BPC award sa kasaysayan sa PBA.
Ang kanhi University of Cebu (UC) Webmaster star nga si Fajardo una nang mikulit sa iyang legasiya sa liga human makuha ang ikalima niyang sunod-sunod nga MVP title sa miaging season.
Si Fajardo mi-average og 22.1 points ug 12.5 rebounds karon nga conference. Siya ang nag-una sa statistical points sa iyang 42.2.
Dako kaayo iyang labaw sa nagsunod nga sila si Sean Anthony ug Stanley Pringle sa Northport Batang Pier nga adunay 37.1 SPs ug 36.1 SPs.
Nalakip sa top five mao sila si Calvin Abueva sa Phoenix Fuel Masters ug RR Pogoy sa TNT KaTropa sa ilang 34.9 SPs ug 34.7 SPs.
Sa laing bahin, sila si No. 1 pick CJ Perez sa Columbian Dyip, Robert Bolick sa Northport ug Javee Mocon sa Rain or Shine Elasto Painters maoy nag-unang tulo ka kandidato alang sa Rookie of the Year.
Si Perez adunay 28.7 SPs, gisundan nila ni Bolick ug Mocon nga adunay 23.6 SPs matag usa.