CEBU, Philippines — Kun adunay koponan sa World Cup nga imposible mapilde sa Gilas Pilipinas, kini walay lain mao ang Serbia.
Mao kini ang panahom ni kanhi Gilas coach Rajko Toroman, kinsa miingon nga dili na lang maglaum ang Gilas nga makadaog batok sa Serbia nga usa sa mga makasangka sa Pilipinas sa first round sa World Cup sa Agosto didto sa China.
Misalig hinuon si Toroman ngadto ni Gilas coach Yeng Guiao nga makapilde ang nasudnong koponan sa laing lig-ong sama sa Italy ug Angola, apan dili na lang magtuga-tuga ang mga Pinoy kun makasangka na nila ang Serbia nga gihulagway nga usa sa mga powerhouse teams gikan sa Europe.
Ang veteran trainer miingon nga mismo ang Team USA mitan-aw sa Serbia nga lig-ong karibal alang sa kampiyonato sa World Cup.
“Even Kobe Bryant warned the US team how strong Serbia is,” matud pa niya sa The Philippine Star, ang igsuong mantalaan sa Banat News. “Right now, Serbia has 12 players at the highest level in the NBA and EuroLeague.”
Ang Serbia bidahan sa 7-foot-3 nga si Boban Marjanovic sa Philadelphia 76ers, Bogdan Bogdanovic sa Sacramento Kings ug MVP contender karon nga season nga si Nikola Jokic sa Denver Nuggets.